Teater Roep

Ek sit in die teater en wag om geroep te word.

Gisteraand, die 19e, het Anné gesê ons moet maar kyk hoe lyk dinge maar ons moet reg wees om hospitaal toe te gaan.

Ds Tertius het my laat weet watter liedjies ons vanoggend in die kerk met die nagmaal en doop-diens sou sing. Ek het hom laat weet van ons situasie en dat ek dit dalk nie sou maak nie.

Maar toe ek vanoggend wakker word, is ons steeds by die huis. Anné het 'n bietjie kon slaap en als het gedui daarop dat die naweek wat Dr. vd Walt uitstedig is ook sonder drama sou verloop. Ek het koffie gemaak, voorberei vir die kitaarspel in die kerk en was kerk toe. Anné en Elsoné het by die huis gebly.

Dit was 'n langerige diens, en toe ek by die huis kom is Elsoné en Anné aangetrek en Mooimooi vertel vir my sy gaan by Zanné kuier en Mamma gaan dokter toe.

Nou ja, ek maak toe nog koffie.

En dan ons bespreek dit en dis duidelik dat Anné nie lekker voel nie. Sy't seer en kan nie loop nie en daar is kontraksies so elke 15 of so minute. Nou wil sy by my weet of sy 'n sussie is en of dit nie onnodig hospitaal toe gaan wees nie. Sy't verduidelik dat sy nie in kraam wil wees en dis te laat om 'n keisersnee te doen nie.

So gesê en toe pak ons die laaste goed, gaan laai vir Mooimooi af en kom hospitaal toe. Dit was so 12:00.

By die host het een van die susters haar ondersoek om te kyk of sy al in kraam is en sy was toe nog nie 'n sentimeter ontsluit nie. Dr Pupuma het baie vinnig vir Anné kom sien en genoem dag haar geskiedenis beteken sy sal ten minste vir 24 uur onder observasie wees. Hy't ordentlike pyn medikasie voorgeskryf en is toe daar weg.

Toe die medisyne begin werk, toe gaan dit ook heelwat beter met Anné. Die kontraksies (volgens 'n masjien) was toe ook nie meer so opmekaar nie. En aan die hartklop kon ons nog sien dat boetie ook tevrede met die lewe is.

Ek het gaan Nando's kry en die dag by Anné deurgebring. Ons het ook lekker cappuccino met room gedrink.

So teen 19:30 het ek begin wonder of ek moet huis se kant toe staan. Ons het aanvaar dr vd Walt gaan ook nie 'n draai kom maak nie, want hy het nie 'n ander pasiënt in die saal nie. En toe, skielik is hy daar. Sommer baie vriendelik en besorg. Hy het verduidelik wat ons opsies is, dat daar 'n 5% kans is vir intensief vir baba weens long ontwikkeling wat dalk nou bietjie kortgeknip moet word. Maar as hy die goeters onderdruk, kan dit wees dat sy more oggend 2 uur in kraam gaan en dan is die klomp wat op roep is dalk vaak, maar die keisersnee moet gebeur.

En, ja, hier sit ek nou met Dr José se broek en Dr Kelling se hemp aan.

Anné is in die teater en hulle gaan my nounou roep.