Te Gou

Ek het nie te veel te sê vanaand nie, maar ek moet dit neerskryf.

Ek en Theuns het gisteraand lekker gekuier oor die foon en op 'n stadium daaroor gepraat dat die kinders te gou groot word, en as ek nou al 'n cliché gehoor het is dit die een. Maar blêddie hel, dis waar. En dis nie asof ek mense nie geglo het as ek dit gehoor het nie. Ek het selfs geweet ek besef nie presies hoe gou die "mense" van praat nie.

Maar nou ... nou weet ek hoe gelaai dit was as ek dit gehoor het; en hoe gelaai dit sou wees as ek die frase ooit sou gebruik teenoor iemand wat nie weet nie - as ek ooit sou. Ek probeer maar om van die clichés af weg te bly en ek kan nie vir jou sê hoekom nie.

En nog 'n ding, ek weet nie hoekom nie en ek wil ook nie morbied raak hier nie, maar ek wil dit op rekord hê. In my onkunde het ek altyd gewonder hoekom ouers so hartseer kan wees oor 'n jong babatjie wat hulle aan die dood moes afstaan. 'n Ingenieur se brein sukkel om sin daarvan te maak, want sy brein wil "compute" dat daar nog nie tyd was om regtig geheg en selfs afhanklik van so 'n jong lewetjie te kon word nie. Hier waar ek sit sal ek erken dat dit een van my grootste denkfoute ooit is. En die hoofrede daarvoor is dat ek daaroor gedink het. Dit is nie 'n dink-ding nie en ook nie 'n ding wat ingenieurs sal verstaan nie, tensy daai ingenieur skielik 'n pa geword het.

My Mooimooi is al lankal meer werd as alles wat ek ooit sal besit en ek is al net so lief vir haar as wat ek vir my vrou is.

En op 'n ander noot - Elsoné is definitief op die loesing pad. Om die waarheid te sê, sy het waarskynlik vanaand haar eerste regte pak slae gekry by haar ma. Ek sê "waarskynlik" want ek het dit nie met my oë waargeneem nie, maar hier waar ek voor die rekenaar gesit het, het my ore dit waargeneem (en ek praat nie net van die dreigemente nie). So, ek dink dit kwalifiseer. Anné sê dat Elsoné definitief die boodskap gekry het.

Ek het later maar vir Mooimooi gesê sy het 'n taktiese fout gemaak deur vir ons te wys dat 'n drag slae dalk so nou-en-dan die nodige uitwerking sal hê. Sy het toe eerder net ge-"smile" en gevolglik my met haar "cuteness super power" in elk geval uitoorlê.

Fotos: Op 'n beter noot

Sy het Frodo se gerugkrappery vreeslik geniet!

Was nie so 'n "happy camper"
gewees die dag nie toe
het Anné haar by my
op die gras kom neersit.

Haar buy het op die
ou end heelwat verbeter,
seker die vars lug. Maar
dit was ook haar eerste
grasperkkennismaking.

Sommer net daar by El Pescatore in Ballito

Nog 'n speelsessie met haar houtblokkies wat Elwica-hulle gegee het.

Pa en Baba se eerste saambad...

Elsie en Elsoné is definitief erg oor mekaar

Elsoné se "superpower": Sy kan inkopies-doen laat "cute" lyk!

Ons Nuwe SA

Ek het hierdie gisteraand geskryf maar was in die rede geval en het toe nie dit kon oplaai nie:

Geen nuus is goeie nuus - ek is seker ek het al dit gesê van hierdie blog - en dit geld nogsteeds. Elsoné groei goed, vorder goed en ons Joubertjies het selde 'n afdag. Die dat dit so stil was die afgelope twee weke hier. 

Maar een ding is seker - hierdie afgelope week was nie 'n week van "geen nuus" vir Suid Afrika nie. En ek het vir die eerste keer in my lewe ervaar hoe my perspektief oor die lewe verander het vandat ek 'n ouer - en dalk meer spesifiek 'n pa - is. 

Ek wil nou nie 'n debat begin nie - daar is meer as genoeg daarvan aan die gang. Ek wil ook nie politiek praat nie. Ek wil neerpen wat my ervaringe die afgelope week of twee was as pa, want dit is vars in my geheue en gevoelens. Plus, oor 'n jaar-of-wat sal dit baie interessant wees om dit weer te lees, ongeag van wat tussen nou en dan gebeur.
Die nuus waarvan ek praat is onder andere berigte oor :

• die drama in Amerika t.o.v. hulle besluiteloosheid oor addisionele skuld wat hulle moet maak,

• Malema en die ANC jeugliga se uitlatings oor Botswana se regering

• Cosatu se erkenning dat nasionalisering op pad is

• Zenzele Nxumalo se moord vanoggend

• Apple se patente-oorlog teen Android produkte

Die deel oor Apple en Android is maar net 'n grappie, maar die res werk op my senuwees oor verskeie redes - en ek was nog altyd die ou wat die blink kant aan ons geliefde SA se donker wolkies kon sien. Maar toe Tim Maandagoggend 'n onheilsprentjie skets waarin dit lyk of die ANC jeugliga se hoofagenda is om anargie te stook by die massas sodat die hele land omver gewerp word was die enigste ding waaraan ek kon dink my Mooimooi en hoe dit haar onskuldige lewetjie vorentoe kan beïnvloed. Die gevoel het eintlik my hart sommer omklem. 

En hier waar ek nou sit voel ek sommer belaglik om dit alles te erken - teenoor myself en teenoor elkeen wat hierdie miskien sal lees. Want ek herinner myself nou daaraan dat daar elke nou en dan 'n huidige "groot gevaar" na vore kom vir Suid Afrika en elke keer kry ons 'n manier om tog maar ...

Dis so ver ek gekom het en ek gaan dit sommer net daar los ook.

Fotos: Lekker Baie Fotos

Sommerfotos

Sommer net 'n oulike fototjie van 'n oulike Mooimooi

Lê lekker by Mamma voor sy begin regmaak vir werk

Elwica en Herman se Kuier

By Mapelane 'wyl ons regmaak vir piekniek

Elwica en Herman het voorlaasweek vir ons kom kuier. Hulle was Vrydag al hier en het lekker hier gekuier tot Woensdag (6 Julie). Ons het die naweek so bietjie Mapelane toe gegaan op die Saterdag om te gaan piekniek hou en die Sondag was ons wildtuin toe. Dit was Elsoné se eerste regte blootstelling aan buiteliglewe wat ons so geniet.

Oom Herman en Tannie 'Wica kuier bietjie saam met Mooimooi  - Pa  braai eier en spek

In die Wildtuin

Betyds vir sonop in die wildtuin

By Mpila kamp het ons koffie gedrink. Maar dit was koud en die son wou nie lekker skyn nie.

Middagete (worsbroodjies) by die piekniekplek reglangs die Hluhluwe-rivier

Sommer nog 'n "bosfoto"

Dit lyk of ons die dag geniet het...

 Die dag was eintlik nogal heel produktief. Ons het nie verskriklik baie wild gesien nie, maar Anné was gelukkig genoeg om 'n luiperd te sien toe ons oppad uit die park is. Ons het vroegerig die oggend al leeus ook gekry. Daar was heelwat witrenosters te sien en ons het 'n hele paar keer buffels ook gesien. Ons het net uitgemis op Oom Olifant, ai.

Hierdie drie zebra's was baie op hulle senuwees
waar Anné die luiperd gewaar het.
Kyk die wond op die vulletjie se
agterbeen ... is dit deel van die storie?

Sprinkaanvoëls en Buffels oppad uit die wildtuin uit naby die boonste hek van Hluhluwe kant

Lang Hare

Lawwe gesig  met woeste babahare

Pa en Mooimooi se hare het begin rof raak. Hierdie twee fotos is geneem die dag voordat myne (en Elsoné s'n sou ook) gesny is.

Pappa en Mooimooi se krullebosse

Net Pappa en Mooimooi

Die nadrag van 'n eerste Pappa-voersessie

Ek het laasnaweek so bietjie te sê gehad hier op die blog oor die feit dat ek en Elsoné weer 'n naweek net mekaar se geselskap gehad het - Anné was mos Johannesburg toe vir 'n konferensie (klink meer of dit 'n geveg was).

Ek en Elsoné het lekker rustig naweek gehou, maar ek het weer besef dat dit eintlik 'n voltydse ding is om na haar te kyk - nie dat 'n mens omgee nie.

Ek het kans gehad om haar te voer, iets wat ek eintlik nog nooit gedoen het tot laas naweek toe nie en dit was uit die aard 'n bietjie van 'n leerkurwe maar ook lekker op 'n manier.

Ek het haar aan die koei voorgestel,
en sy het dit nou geniet...

Anné was darem al 11h25 terug Sondagoggend en die Weichs was die afgelope twee weke op vakansie in Ballito, so hulle het Sondag ook 'n bijetjie vir ons kom kuier.

Die Weichs het ook kom kuier en Riechard en Ruan kon 'n
nuwe maatjie maak.

En Verder?

Die maan het mooi kringe gemaak Maandagaand - ek kon
darem 'n gawe foto daarvan maak.

Met die dat Elsoné se hare toe nie saam met myne gesny
is nie, het Anné dit toe maar self 'n bietjie ge-"trim".

Sy sit te oulik in die bad, haar bene maak'n
diamant "<>" onder haar en sy sit al
lekker sterk so.

Hoe kon ek nie hierdie foto oplaai nie...

Daashy, ons albei se hare 'n bietjie ge-"trim"...

Okay, nee, niks slaap nie

Sy was blykbaar nie so moeg as wat ek gedag het nie...

Gevoer

Ek het gou my hare by Ange laat sny - Mooimooi s'n moes ook gesny word, maar daar was 'n kommunikasiegaping.

By die huis gekom was dit tyd om haar te voer - ek het haar gevoer gekry, maar natuurlik nie sonder sukkel nie - sy was nie baie lus vir die hoender en wortel nie, maar het geen probleem met jogurt nie. Sy het seker goed genoeg geëet. Daar was 'n paar benoude oomblike met vreemde proes geluide en gesigte wat haar onervare pa laat wonder het of hy in 'n noodtoestand-mode moet ingaan. Dit was gelukkig nie nodig nie.

Ek het haar in die bed gesit om hopelik 'n bietjie te slaap voor badtyd - sy het gister 'n koekskoot geslaap hierdie tyd so ons sal maar sien.

Weer net Ek en Mooimooi

Ek het nou net vir Anné by die lughawe gaan aflaai. Sy gaan vir die naweek Gauteng toe vir werk. Ek en Mooimooi sal mekaar maar geselskap hou. Ek is hierdie keer 'n bietjie meer uit my diepte as laas toe dit net ons twee was. Nou moet daar gevoer word met vaste kos en sy slaap heelwat minder deesdae, so ons sal maar sien hoe dit gaan.

Maar dit gaan lekker wees om so baie van haar te hê - die afgelope week het ek haar maar minnerig gesien.

Ek wou nog sê

Golf


Dis nou al Woensdag en ek wou al laas Donderdag hierdie inskrywing gemaak het. Dit verduidelik hoekom dit voel of die tyd so gou verbygaan - dit doen...

Al wat ek toe wou sê is dat ek en Anné gaan golf speel het Donderdag. Dit was nou al die derde poging gewees om dit gereël te kry, maar hierdie keer het die planete in 'n ry gestaan dat dit uiteindelik kan gebeur.

Dit was die eerste keer wat ek en Anné saam kon gaan golf speel sedert laas jaar die 13e Julie toe ons op vakansie was. Dit was ook die eerste keer wat ons vir so lank saam sonder Mooimooi was - nie dat ons dit nodig gehad het nie.

Dit was baie lekker. Anné het my 'n goeie "go" gegee op die eerste agt gate - daar was net een punt in dit. Maar sy was baie moeg gewees by die halfpadpunt en haar wiele het heeltemal afgekom met die tweede nege. Daar was nie 'n karretjie te huur vir die tweede nege nie so sy moes maar stap.

Ons het so bietjie skuldig gevoel oor ons vir Elsoné so op haar eie los, maar aan die ander kant was dit baie lekker om so bietjie ons eie ding te doen.

Raak nou Erg

Ek besef elke nou en dan hoe erg ek oor haar raak amper tasbaar. Ek kan dit nie regtig beskryf nie, so ek gaan nie eers probeer nie.

Stoutigheid

Dis dalk 'n bietjie gou om te sê maar daar is tekens dat sy al begin om die uiterstes te beproef om te sien hoe ver sy met ons gaan wegkom op 'n paar goed. Ek wonder hoe ons dit gaan hanteer as ons besef sy is regtig besig om stout te wees.

Vordering

Sy raak by die dag meer seker met haar hande en haar nek raak sterker en haar spiere word al sterker en slimmer om te balanseer as mens haar ronddra. As mens haar op haar maag neersit wil-wil sy al haar boude lig om op haar knieë te kom en in 'n kruipposisie te kom. Maar die tande bly darem nog steeds weg en sy vorder nie te vinnig dat 'n pa en ma nie kan byhou nie.

Video: Vadersdag handewerk

Anné het my omgepraat om die spaarkamer se vloer ook te tackle en te doen soos Elsoné se kamer. Ons het toe maar vandag ingespring en dit gedoen. Ek het 'n videotjie gemaak om te wys hoe dit gevorder het:

From Om Pa Te Word

Fotos: Vadersdag ens.

Ek is so stadigaan besig om 'n ateljeetjie aanmekaar te slaan vir bietjie kameraspeletjies. Die eerste fotos is die week daar geneem en dis ongelooflik watse verskil 'n swart agtergrond maak...

Elsoné is nog bietjie dom in die Jolly-jumper maar dit sal kom. Anné het haar gister sommer in hom gevoer en daar is allerhande joligheid wat daarmee gepaard gaan...

Sy het nou ook al haar badraampie waarin sy lê gedurende badtyd begin ontgroei en sy moet nou leer sit in die bad op haar nuwe mat wat keer dat sy so gly in die bad. Die eerste sessie het haar wel gesig-vooroor in die water laat beland, maar sy sal regkom

Voor die "faceplant"

Na die "faceplant"

Sy het dit toe darem nog kon geniet na die "faceplant

Anné het vir ons albei T-hemde gegee vir vadersdag. Hare het 'n foto van my agter op en die woorde "Pa se Mooi-mooi" voor op en myne 'n foto van haar met die woorde "Mooi-mooi se Pa" voorop. Flippen cool!